Mga Madalas Itanong

Makakatanggap pa rin ba ako ng koreong balota?

Oo. Ayon sa batas ng Nevada, lahat ng aktibong rehistradong botante na nakapagparehistro nang hindi bababa sa 14 na araw bago ang Araw ng Halalan ay awtomatikong padadalhan ng koreong balota, maliban kung pinili nilang hindi sumali sa pagboto gamit ang koreong balota.

Ang pagtanggap ng koreong balota ay hindi nangangahulugang kailangan mong bumoto sa pamamagitan ng koreo. Maaari ka pa ring pumiling bumoto nang personal sa alinmang lugar ng maagang botohan o sentro ng botohan sa Araw ng Halalan. Kung boboto ka nang personal, hindi na rin mabibilang ang koreong balotang ipinadala sa iyo.

Saan ako maaaring bumoto nang personal?

Sa Clark County, kung ikaw ay residente ng Clark County, maaari kang bumoto sa alinmang lugar ng maagang botohan o sa alinmang sentro ng botohan sa Araw ng Halalan (NRS 293.3072). Nagbibigay ito sa iyo ng higit na kalayaan na pumili ng lugar na malapit sa iyong tahanan, trabaho, o anumang lokasyong mas maginhawa para sa iyo.

Maaari ba akong magparehistro at bumoto sa magkaparehong-araw?

Oo. Nag-aalok ang Nevada ng Magkaparehong-Araw na Pagpaparehistro (Same-Day Registration),

na nagpapahintulot sa mga kwalipikadong botante na magparehistro upang bumoto o mag-update ng kanilang rehistrasyon at bumoto nang personal sa panahon ng maagang pagboto o sa Araw ng Halalan. Kung magpaparehistro ka o mag-a-update ng iyong rehistrasyon sa isang sentro ng botohan, kailangan mong bumoto sa oras din na iyon.

Upang magamit ang Magkaparehong-araw ng Pagpaparehistro, kailangan mong magpakita ng isang hindi expired na lisensya ng pagmamaneho sa Nevada, Nevada ID Kard, pansamantalang dokumento mula sa Nevada DMV, o Tribal ID (NRS 293.5837, 293.5842, 293.5847). Kung ang iyong ID ay walang kasalukuyan mong address ng tirahan, kailangan mo ring magbigay ng patunay ng paninirahan, tulad ng utility bill, statement ng banko, rehistrasyon ng sasakyan, paycheck, o dokumentong na ibinigay ng ahensya ng gobyerno.

Upang makapagparehistro at makaboto sa Nevada, kailangan mong:

• Maging mamamayan ng Estados Unidos.
• Hindi bababa sa 18 taong gulang sa o bago ang Araw ng Halalan.
• Naninirahan sa Nevada nang hindi bababa sa 30 araw bago ang halalan at sa iyong kasalukuyang tirahan nang hindi bababa sa 10 araw. (NRS 293.485)

Ang mga balotang ibinoto sa Magkaparehong-Araw ng Pagpaparehistro ay mga pansamantalang balota.

Ang mga pansamantalang balota ay naglalaman ng parehong labanan katulad ng pangkaraniwang balota at bibilangin lamang ang mga ito kapag napatunayan na ng mga opisyal ng halalan ang iyong pagiging kwalipikadong botante at ang tamang impormasyon ng iyong rehistrasyon.

Maaari ko bang ihulog ang aking koreong balota sa isang lugar ng botohan?

Oo. Lahat ng lugar ng maagang botohan at mga lugar ng botohan sa Araw ng Halalan ay tumatanggap ng mga nakumpletong koreong balota sa oras ng pagboto. Ang Kagawaran ng Halalan at ang limang tanggapan ng Klerk ng Lungsod ay nagsisilbi ring mga karagdagang lugar kung saang maaari mong ihulog ang iyong koreong balota.

Paano ako makakakuha ng tulong sa wika o madaling pag-access sa serbisyo?

Sa Clark County, ang mga balota at materyales sa halalan ay naka print sa wikang Ingles, Espanyol, at Filipino, alinsunod sa iniaatas ng Seksyon 203 ng pederal na Karapatan sa Pagboto.

Kung nagsasalita ka ng ibang wika, maaari kang humiling ng serbisyo ng tagapagsalin sa mahigit 200 na wika sa pamamagitan ng pagtawag sa (702) 357-3379. Maaari ka ring magsama ng isang taong iyong pinili (maliban sa iyong employer o kinatawan ng unyon) upang tumulong sa iyo sa loob ng botohan (NRS 293.296).

Kung kailangan mo ng tulong dahil sa kapansanan, kahirapan sa pagbasa o pagsulat, o iba pang dahilan, maaari kang magsama ng isang taong iyong pinili upang tulungan kang bumoto, hangga’t ang taong iyon ay hindi iyong employer o kinatawan ng unyon (NRS 293.296). Ang mga manggagawa sa halalan ay maaari rin magpaliwanag ng proseso ng pagboto at magbigay ng tulong kung hihilingin.